अतिवृष्टीत वाहून गेलेल्या विहिरीमुळे होत होती प्रचंड गैरसोय
मुंबई : खेड तालुक्याच्या मुख्यालयापासून जवळपास 65 किलोमीटर अंतरावर असलेल्या निवे रामवाडीचा आणि प्रश्न मार्गी लागला आहे. जल फाउंडेशनच्या माध्यमातून मुंबईतील महाराष्ट्र कॉलेजचे शिक्षक, कर्मचारी तसेच विद्यार्थी यांनी रामवाडी येथील ग्रामस्थांच्या पाण्याच्या सोयीसाठी आर्थिक मदत केल्याने त्यामधून नुकतीच कुपनलिका खोदण्यात आली आहे. यामुळे रामवाडी ग्रामस्थांचा पाणी प्रश्न निकाली निघाला आहे.
रत्नागिरी जिल्ह्यातील खेड तालुक्यातील तालुक्यापासून जवळजवळ ६५ किलोमीटर अंतरावर निवे रामवाडी वसलेली आहे. निवे रामवाडीतील लोकांना असलेल्या विहिरीमधून पाणी पिण्यासाठी उपलब्ध होत असे. मात्र, दि. २१ आणि २२ जुलै २०२१ रोजी झालेल्या अतिवृष्टीमुळे निवे रामवाडीची नदीमध्ये असलेली विहीर प्रचंड पाण्यामुळे वाहून गेली आणि निवे रामवाडीची पाणी समस्या निर्माण झाली.
पाण्याच्या सोयीसाठी असलेली विहीरच वाहून गेल्यामुळे खेड तालुक्यातील दुर्गम भागात असलेल्या निवे रामवाडी लोकांना पाण्यासाठी वणवण करावी लागत होती. पाण्यासाठी व्याकूळ झालेल्या निवे रामवाडी ग्रामवासीयांचा पाणी प्रश्न सोडण्यासाठी जल फाऊंडेशने पुढाकार घेतला. ही समस्या समाजसेवक खालीद भाई चौगुले यांच्याजवळ मांडल्यावर महाराष्ट्र कॉलेज मुंबई या कॉलेजचे प्राध्यापक डॉ सिराज चौगुले यांच्या नेतृत्वाखाली शिक्षक कर्मचारी आणि विद्यार्थ्यांनी निवे रामवाडीसाठी बोअरींगसाठी आर्थिक स्वरूपात मदत केली.
सोमवार दि. १७ एप्रिल २०२३ रोजी निवे रामवाडीत बोअरींग मारून पाणी प्रश्न मार्गी लावला. निवे रामवाडी ग्रामवासियांच्या वतीने महाराष्ट्र कॉलेज मुंबई विद्यार्थ्यांचे, समाजसेवक खालिद भाई चौगुले,जल फाऊंडेशचे अध्यक्ष नितिन जाधव, जल फाऊंडेशनचे सल्लागार वसंत मोरे, जल फाऊंडेशन टीमचे, नाडकर बोअरवेलचे नाडकर आणि त्यांचे सहकारी यांचे मनःपूर्वक आभार मानण्यात आले.
