भाजप नेते किरीट सोमय्या यांनी अनिल परब यांच्यावर केले होते आरोप
दापोलीः मुरूड येथील बहुचर्चित साई रिसॉर्ट व सी कोच रिसॉर्ट बांधकाम पाडण्यासाठी सार्वजनिक बांधकाम विभाग, चिपळूण यांनी अखेर निविदा प्रसिद्ध केली आहे. हे रिसॉर्ट तत्कालीन पालकमंत्री अनिल परब यांचे असल्याचा आरोप भाजपचे माजी खासदार किरीट सोमय्या यांनी वेळोवेळी केला आहे.
या निविदेनुसार दापोली तालुक्यातील मौजे मुरुड सर्वे नंबर ४४६मधील साई रिसॉर्ट बांधकाम एनएक्स व सी कोच रिसॉर्ट बांधकाम व इमारतीसाठी पुरविलेल्या सोयीसुविधा निष्कासन करणे व त्या अनुषंगाने निर्माण होणारी संभाव्य मोडतोड व इतर सामग्री योग्यरितीने गोळा करून विल्हेवाट लावण्यासाठी वापरात येणाऱ्या साहित्यांचे मूल्यांकन करणे, तसेच अस्तित्वात असलेल्या इमारती व इतर बाबी सविस्तर नकाशे ५ प्रती तयार करून त्याला सक्षम प्राधिकरणाची मान्यता घेणे, यासाठी योग्य त्या सल्लागाराची नियुक्ती करण्यासाठी दरपत्रक मागविण्यात येत आहेत. ही दरपत्रके १२ ते १९ सप्टेंबर या कालावधीत मोहरबंद लखोट्यातून २२ सप्टेंबरपर्यंत दुपारी २ वाजेपर्यंत स्वीकारण्यात येतील, असे म्हटले आहे. त्यामुळे आता लवकरच साई रिसॉर्टवर बांधकाम विभागाचा हातोडा पडणार, हे निश्चित झाले आहे.
