रत्नागिरी, १३ ऑगस्ट : उच्च न्यायालयाने राष्ट्रध्वजाचा अवमान रोखण्यासाठी कृती समिती स्थापन करून त्यामध्ये सामाजिक संस्थांचा समावेश करण्याचे आदेश दिले आहेत यामध्ये प्लास्टिकच्या राष्ट्रध्वजाच्या माध्यमातून होणारा अवमान रोखण्यासाठी जनजागृती करणे अपेक्षित आहे. हिंदू जनजागृती समिती गेली २० वर्षे राष्ट्रध्वजाचा सन्मान राखा ही मोहीम राबवत आहे. या निमित्ताने जिल्ह्यात प्लास्टिकच्या राष्ट्रध्वजाचे उत्पादन आणि विक्री होत असल्यास संबंधितांवर तात्काळ कारवाई करण्यात यावी, अशी मागणी हिंदू जनजागृती समितीच्या वतीने प्रशासन आणि पोलीस यांच्याकडे निवेदनाच्या माध्यमातून करण्यात आली.
शासनाने सर्व शाळा आणि महाविद्यालय यामध्ये राष्ट्रध्वजाचा सन्मान राखा हा उपक्रम राबवण्यासाठी निर्देश द्यावेत अशी विनंतीही या निवेदनात करण्यात आली आहे.समिती प्रत्यक्ष आणि सामाजिक माध्यमातून प्रबोधन करत आहे. शाळा आणि महाविद्यालय यामध्ये व्याख्याने, प्रश्नमंजुषा हस्तपत्रके , भित्तीपत्रके आणि फ्लेक्स फलक या माध्यमातून हा विषय समाजात रुजवत आहे, आणि त्यातला यशही मिळाले आहे.
राष्ट्रध्वजाचा सन्मान राखण्याविषयी प्रशासकीय परिपत्रक काढणार- निवासी उपजिल्हाधिकारी चंद्रकांत सूर्यवंशी.
राष्ट्रध्वजाचा सन्मान राखा याविषयी निवेदन जिल्हाधिकारी एम देवेंद्र सिंह यांना दिल्यानंतर या संदर्भात चर्चा करण्यासाठी हिंदू जनजागृती समितीचे श्री. संजय जोशी यांना जिल्हाधिकारी कार्यालयाकडून बोलावण्यात आले, निवासी उपजिल्हाधिकारी श्री. चंद्रकांत सूर्यवंशी यांनी समितीने दिलेल्या निवेदनाविषयी सविस्तर माहिती घेतली आणि या संदर्भात आम्ही प्रशासकीय परिपत्रक काढत आहोत त्याची प्रत समितीला देण्यात येईल असे सांगितले.
रत्नागिरीसह जिल्ह्यात चिपळूण,दापोली आदि ठिकाणीही निवेदन देण्यात आले. जिल्हाधिकारी एम देवेंद्र सिंह यांना तसेच जिल्हा पोलीस अधीक्षक धनंजय कुलकर्णी, प्रांताधिकारी जीवन कांबळे, तहसीलदार राजाराम म्हात्रे, माध्यमिक शिक्षणाधिकारी श्रीमती सुवर्णा सावंत, प्राथमिक शिक्षणाधिकारी श्रीमती प्रेरणा शिंदे यांनाही निवेदन देण्यात आले. यावेळी सर्वश्री. अरविंद बारस्कर,प्रवीण बोरकर, चंद्रकांत राऊळ, युवराज चिखले, तन्मय जाधव, शशिकांत जाधव, रमण पाध्ये, अशोक पाटील, चंद्रशेखर गुडेकर आणि संजय जोशी आदि राष्ट्रप्रेमी उपस्थित होते.
चिपळूण येथे नायब तहसीलदार शकील मुल्ला आणि पोलीस निरीक्षक रवींद्र शिंदे यांना निवेदन देण्यात आले. यावेळी गुहागर तालुका वारकरी संप्रदायाचे खजिनदार ह. भ.प. प्रकाश महाराज निवळकर यांचेसहअनेक धर्मप्रेमी व हिंदू जनजागृती समितीचे श्री. सुरेश शिंदे उपस्थित होते . दापोली येथे नायब तहसीलदार शरद कुमार आडमुठे आणि पोलीस ठाण्याचे हवालदार चरणसिंग पवार यांना निवेदन देण्यात आले.यावेळी राष्ट्रप्रेमी नागरिक मोठ्या संख्येने उपस्थित होते.
