रत्नागिरी : शैक्षणिक क्षेत्रातील अग्रगण्य आणि सातासमुद्रापलीकडे आपला ठसा उमटविणाऱ्या परशुराम एज्युकेशन सोसायटी चिपळूण, या संस्थेचा १०५ वा वर्धापन दिन १५ ऑक्टोबर २०२३ रोजी मोठ्या उत्साहात संपन्न झाला.
या कार्यक्रमासाठी प्रमुख पाहुणे म्हणून राष्ट्रीय शैक्षणिक धोरणाचे अभ्यासक आणि तज्ज्ञ मार्गदर्शक श्री. सौरभजी रामचंद्र बोडस हे उपस्थित होते.
सर्वप्रथम प्रमुख पाहुणे श्री सौरभजी रामचंद्र बोडस, संस्था अध्यक्ष माजी एअर मार्शल श्री.हेमंतजी भागवत ,संस्था उपकार्याध्यक्ष श्री.विजयकुमार ओसवाल यांच्या हस्ते सरस्वती पूजन आणि दीपप्रज्वलन करण्यात आले. यावेळी युनायटेड इंग्लिश स्कूलच्या गुरुकुल विभागातील विद्यार्थ्यांनी शिक्षक श्री.पराग लघाटे सर यांच्या मार्गदर्शनाखाली ईशस्तवन सादर केले.
कार्यक्रमाचे प्रास्ताविक युनायटेड इंग्लिश स्कूल शाळेच्या मुख्याध्यापिका सौ.स्वप्नाली पाटील मॅडम यांनी केले. यामध्ये त्यांनी संस्था आणि शाळा यांचा १०५ वर्षाचा गौरवशाली इतिहास मांडला.
त्यानंतर अलोरे हायस्कूलचे माजी मुख्याध्यापक आणि निवृत्ती नंतरही संस्थेचे समन्वयक म्हणून सेवा योगदान देणाऱ्या श्री.अरुण माने सर यांचा संस्था उपकार्याध्यक्ष श्री.विजयकुमार ओसवाल यांच्या हस्ते सन्मान करण्यात आला.
प्रमुख पाहुणे श्री. सौरभजी रामचंद्र बोडस यांचा परिचय युनायटेड इंग्लिश स्कूल शाळेच्या शिक्षिका सौ.वैशाली चितळे मॅडम यांनी करून दिला.
संस्थेचे अध्यक्ष श्री हेमंत भागवत यांनी प्रमुख पाहुणे श्री.बोडस यांना संस्थेचे सन्मान चिन्ह, शाल,श्रीफळ देऊन त्यांचे स्वागत केले. आपल्या व्याख्यानातून श्री. बोडस यांनी
कोणतीही संस्था ही तिथे काम करणाऱ्या कर्मचाऱ्यांमुळे नावारूपास येते असे सांगत
२०२० मध्ये आलेल्या राष्ट्रीय शैक्षणिक धोरणाची अंमलबजावणी कशी करावी आणि यामध्ये शिक्षक म्हणून आपली जबाबदारी काय आहे याची जाणीव करून दिली .नवीन शैक्षणिक धोरण प्रत्येकाने समजून घेऊन आपल्या विद्यार्थ्यांना अनुभव संपन्न बनवायला हवे,
नवीन शैक्षणिक धोरणातील विविध टप्पे, त्यामध्ये येणारे अत्यंत महत्त्वाचे पाच स्तंभ याचा विचार करून प्रत्येक शिक्षकाने आपल्या विद्यार्थाला सक्षम बनविण्यासाठी सतत प्रयत्नशील राहायला हवे.
मातृभाषेतून शिक्षण देणे आणि विद्यार्थ्याला कौशल्य प्राप्त करण्यासाठीचे ज्ञान देणे, अनुभवावर आधारित शिक्षण देणे हेच या राष्ट्रीय शिक्षण धोरणाचे मूलभूत तत्व आहे असे मौलिक मार्गदर्शन केले. नवीन शैक्षणिक धोरणाबाबत अतिशय अभ्यासपूर्ण माहिती त्यांनी सांगितली.
संस्थेचे अध्यक्ष एअर मार्शल श्री हेमंत भागवत यांनी अध्यक्षीय भाषणात सर्व कर्मचार्याना १०५ व्या वर्धापन दिनाबद्दल शुभेच्छा दिल्या. संस्था ,कर्मचारी यांची भविष्यकाळात नवीन शैक्षणिक धोरणाला धरून कोणती जबाबदारी आहे यावर आपले विचार मांडले.
आपली संस्था ही अत्यंत नामांकित अशी संस्था आहे. शिक्षण प्रक्रियेमध्ये आपल्या संस्थेचे योगदान खूप मोठे आहे. ते तसेच आपल्याला वृध्दिंगत करायचे आहे. यासाठी शिक्षकांची भूमिका अत्यंत महत्त्वाची आहे.संस्था म्हणून आम्ही आपणाला सर्व आवश्यक भौतिक सुविधा उपलब्ध करून देऊ अशी हमी दिली. शिक्षक हा शिक्षण व्यवस्थेचा कणा आहे. अत्यंत नम्रपणे तुम्ही मुलांच्या विकासासाठी कार्य केलेत तर तुम्ही आयुष्यभर मुलांच्या आणि समाजाच्या मनात घर करता. सदैव मुलांसाठीच कार्य करा असा अतिशय मौलिक संदेश संस्थेचे अध्यक्ष एअर मार्शल श्री हेमंत भागवत साहेब यांनी दिला.
प्रेमजीभाई प्राथमिक शाळेच्या मुख्याध्यापिका सौ.संगीता नाईक मॅडम यांनी उपस्थितांचे आभार मानले.
या कार्यक्रमासाठी संस्था अध्यक्ष श्री हेमंत भागवत साहेब,उपकार्याध्यक्ष श्री विजयकुमार ओसवाल साहेब यांच्यासह संस्थेचे आजी माजी संचालक,संस्थेच्या सर्व शाळांचे आजी,माजी मुख्याध्यापक,
उपमुख्याध्यापक, पर्यवेक्षक शिक्षक ,शिक्षिका, शिक्षकेत्तर कर्मचारी मोठ्या संख्येने उपस्थित होते.
अतिशय आनंदी वातावरणात हा वर्धापन दिन संपन्न झाला.
कलाशिक्षक श्री. पराग लघाटे यांनी पसायदन सादर केले आणि कार्यक्रमाची सांगता झाली. या कार्यक्रमाचे सूत्रसंचालन प्रा.सौ.संगीता जोशी यांनी केले.
