रत्नागिरी तालुक्यातील वाटद कवठेवाडी शाळेत महापरिनिर्वाणदिनी उपक्रम
रत्नागिरी : तालुक्यातील वाटद कवठेवाडी या शाळेत डॉ. बाबासाहेब आंबेडकर यांच्या महापरिनिर्वाण दिनानिमित्त सलग १२ तास वाचन वर्ग आयोजित करून बाबासाहेबांना अनोखी आदरांजली वाहण्यात आली. या उपक्रमाची प्रशंसा होत आहे
भारतीय राज्यघटनेचे शिल्पकार, डॉ. बाबासाहेब आंबेडकर यांचे विचार हे विद्यार्थ्यांसाठी अत्यंत महत्त्वाचे असून, त्यांच्या आयुष्यात दिशादर्शकाचे काम करणारे आहेत. म्हणून विद्यार्थ्यांनी डॉ. बाबासाहेब आंबेडकर यांचे विचार आत्मसात करून त्याप्रमाणे कृती केल्यास एक दिवस नक्कीच त्यांना यशाचा मार्ग दिसेल, असा विश्वास शाळा जीर्णोद्धार समितीचे अध्यक्ष एकनाथ सखाराम तथा अप्पा धनावडे यांनी व्यक्त केला.
ते जिल्हा परिषद प्राथमिक शाळा वाटद कवठेवाडी या शाळेत डॉ. बाबासाहेब आंबेडकर यांच्या महापरिनिर्वाण दिनानिमित्त आयोजित करण्यात आलेल्या सलग १२ तास वाचन उपक्रमाच्या समारोप प्रसंगी बोलत होते.
श्री. धनावडे पुढे म्हणाले की, भारतीय राज्यघटनेचे शिल्पकार डॉ. बाबासाहेब आंबेडकर यांनी संपूर्ण देशाला दिलेल्या राज्यघटनेनुसार देशाचा कारभार चालत असून या घटनेमध्ये बदल करण्याचे कोणतेही अधिकार कोणालाही नाहीत. डॉ. बाबासाहेब आंबेडकरांनी संपूर्ण समाजाला दिशादर्शक विचार आपल्या कार्यातून समाजात पेरले. तेच विचार विद्यार्थ्यांनी आत्मसात करणे काळाची गरज असून, विद्यार्थ्यांना प्रोत्साहन देण्यासाठी पालकांनीही पुढाकार घेतला पाहिजे, असे आवाहन त्यांनी यावेळी केले.
रत्नागिरी तालुक्यातील जिल्हा परिषद प्राथमिक शाळा वाटद कवठेवाडी याशाळेत डॉ. बाबासाहेब आंबेडकर यांच्या महापरिनिर्वाण दिनाच्या औचित्याने विद्यार्थ्यांनाही वाचनाची आवड वाढावी व मानसिकता निर्माण व्हावी, यासाठी शालेय व्यवस्थापन समिती, शाळा जीर्णोद्धार समिती, माता – पालक संघ, शिक्षक – पालक संघ यांच्या संयुक्त विद्यमाने सलग १२ तास वाचन उपक्रमाचे आयोजन करण्यात आले होते.
