खेड : मुंबई – गोवा राष्ट्रीय महामार्गावरील कशेडी घाटात बुधवारी सायंकाळच्या सुमारास ट्रक खोल दरीत कोसळून झालेल्या अपघातात चालक जखमी झाला असून ट्रक दरीतून बाहेर काढण्यासाठी सायंकाळी उशिरपर्यंत प्रयत्न सुरू होते. वाहनावरील चालकाचे नियंत्रण सुटल्यामुळे हा अपघात झाल्याचे सांगितले जात आहे.
बुधवारी दि. ५ रोजी सायंकाळी ३ वा. मुंबई – गोवा राष्ट्रीय महामार्गावर कशेडी घाटातील रायगड जिल्ह्याच्या हद्दीच्या दिशेने प्रतापगड दर्शन पॉईंट या ठिकाणी ट्रक (एम एच ०९ एफ एल ३६४३) हा बेळगांव ते माणगाव असा जाणारा ट्रक दरीत कोसळला. या अपघातात ट्रक चालक प्रशांत चंद्रकांत देसाई (२८ रा.कोथळी, ता.चिकोडी, जिल्हा बेळगाव) जखमी झाला असून वाहनाचे मोठ्या प्रमाणात नुकसान झालेले आहे. या अपघाताची माहिती मिळताच कशेडी पोलिस मदत केंद्रातील पोलिस उपनिरीक्षक ए.पी.चांदणे यांच्या मार्गदर्शनाखाली कर्मचारी समिल सुर्वे व सहकारी यांनी घटनास्थळी पोहचून ग्रामस्थांच्या मदतीने जखमी चालकाला ट्रकमधून बाहेर काढले व उपचारासाठी पोलादपूर येथे पाठवले. या अपघाताची नोंद करण्याचे काम सायंकाळी उशिरा पर्यंत पोलादपूर पोलिस ठाण्यात सुरू होते.
