संगमेश्वर : राजापूर येथे ५ ते ७ जुलै दरम्यान संपन्न झालेल्या जिल्हास्तरीय तायक्वांदो निवड चाचणीत येथील पैसा फंड इंग्लिश स्कूल आणि कनिष्ठ महाविद्यालय संगमेश्वरच्या गंधर्व सुजित शेट्ये आणि ओम योगेश घाग यांची निवड झाली आहे.
बीड येथे संपन्न होणाऱ्या राज्यस्तरीय तायक्वांदो स्पर्धेत गंधर्व सुजित शेट्ये आणि ओम योगेश घाग यांची निवड झाली आहे. हे दोघेही पैसा फंड इंग्लिश स्कूलच्या विज्ञान कनिष्ठ महाविद्यालयात १२ वी च्या वर्गात शिकत आहेत. प्रशालेतर्फे या दोघांचा आज त्यांच्या पालकांसमवेत व्यापारी पैसा फंड संस्थेचे सचिव धनंजय शेट्ये यांच्या हस्ते पुष्पगुच्छ देऊन सन्मान करण्यात आला.
यावेळी या दोघांनाही राज्यस्तरीय स्पर्धेसाठी संस्था आणि प्रशालेतर्फे शुभेच्छा देण्यात आल्या. याप्रसंगी मुख्याध्यापक सचिन देव खामकर, पर्यवेक्षक दिलीप मोरगे, पालक सुजित शेट्ये, योगेश घाग आणि प्रशालेतील शिक्षक उपस्थित होते.
