रत्नागिरीतील कलावैभव संस्थेतर्फे घटस्थापनेच्या दिवशी देवीच्या गीते ऐकता येणार
रत्नागिरी :- शारदीय नवरात्रोत्सवानिमित्त “धावत येई भवानी”हा भक्तीगीतांचा सुरेल नजराणा येथील “कलावैभव” संस्थेतर्फे रसिकांसाठी सादर करण्यात येत आहे. नवरात्रोत्सवानिमित्त देवीची एकाहून एक सरस गीते यानिमित्ताने रसिकांना ऐकायला मिळणार आहेत.
या गीतांची संकल्पना, निर्मिती व निवेदन सौ. अनुया बाम यांचे असून संगीत दिग्दर्शन आकाशवाणीचे मान्यताप्राप्त रत्नागिरीतील प्रसिद्ध संगीतकार अवधूत बाम यांचे आहे. तर ही गीते प्रसिद्ध गायक नरेंद्र रानडे, मीरा सोवनी व स्वतः अवधूत बाम यांच्या सुरेल स्वरांत सजली आहेत.
गीतकार जगदीश खेबुडकर, चिंतामणी भागवत, नितीन देशमुख, शैलेंद्र कानिटकर, श्रीकृष्ण लाटकर यांनी ही गीते लिहिली असून या गीतांना तबला व ढोलकसाथ अभिषेक भालेकर यांनी केली आहे. ध्वनिसंकलन वरद सोहनी यांनी केले आहे, मिक्सिंग-मास्टरिंग भैरी डिजिटल स्टुडिओचे मिलिंद गोवेकर यांनी केले आहे. विशेष सहाय्य स्वप्नील गोरे यांचे लाभले आहे. ही अप्रतिम गाणी अवधूत बाम-कला वैभव युट्यूब चॅनल व फेसबुकवर २६ सप्टेंबर रोजी घटस्थापनेच्या मुहूर्तावर रसिकांना ऐकायला उपलब्ध होणार आहेत. तरी रसिकांनी या गीतांचा आनंद घेण्याचे आवाहन संगीतकार अवधूत बाम यांनी केले आहे.
