देवरूख (सुरेश सप्रे) : सोनवी गडगडी परिसर शिक्षण प्रसारक मंडळ, सोनवडे संचालित माध्यमिक विद्यालय सोनवडेच्या श्रेयस उदय जोशी यांच्या मळणी यंत्राची प्राथमिक गटातून सन २०२०-२१ करीता महाराष्ट्र राज्य ऑनलाईन विज्ञान प्रदर्शनासाठी निवड झाली आहे. श्रेयस जोशी याच्या मळणी यंत्राने संगमेश्वर तालुका व रत्नागिरी जिल्हा स्पर्धेमध्ये प्रथम क्रमांकाचा सन्मान प्राप्त केला होता. श्रेयस याला विज्ञान शिक्षक अमृत मेंगाल आणि प्रशालेतील इतर शिक्षकांचे महत्त्वपूर्ण मार्गदर्शन लाभले.
श्रेयस जोशी याने मळणी यंत्राची माहिती देताना सांगितले, कोकणात शेती बऱ्याच प्रमाणात पारंपरिक पद्धतीने केली जाते. शेतीतून मिळणारी उत्पन्न हे अल्प असते. त्यामुळे कोकणातील शेतकऱ्यांना आधुनिक अवजार घेणे परवडत नाही. अधिक कष्ट व कमी उत्पन्न या समस्येला सामोरे जावे लागते. यासाठी कमीत कमी खर्चामध्ये उपयुक्त ठरणारे हे मळणी यंत्र शेतकऱ्यांना वरदान ठरणार आहे. यासाठी सहज उपलब्ध होणारे सायकलचे जुने चाक, लोखंडी पाईप व सळई यांच्या वापराने हे यंत्र बनवले असून, अत्यंत कमीत कमी खर्चात म्हणजे साधारणतः दोनशे रुपयात हे यंत्र तयार झाले आहे. हे यंत्र आबाल वृद्ध वापरू शकतात. ते वापरण्याची पद्धत ही सोपी आणि सहज आहे. कोणत्याही वयोगटातील व्यक्तीला शेतीतील धान्याची मळणी करणे आता सहज शक्य झाले आहे.
श्रेयस याने मिळवलेल्या यशाचा गौरव करण्यासाठी प्रशालेमध्ये कौतुक सोहळ्याचे आयोजन करण्यात आले होते.
या कार्यक्रमाला विद्यार्थ्यांसह प्रशालेचे निवृत्त कलाशिक्षक विष्णु परीट, मुख्याध्यापक शिवाजी बंडगर, मार्गदर्शक शिक्षक अमृत मेंगाल, सूजय सरदेसाई, अभिजीत कदम, सुलेखा मोहिते, सुवर्णा बनकर, मयूर तांबे, विनंती निवळकर यांच्यासह ग्रामस्थ यांची उपस्थिती होती. श्रेयस जोशी याने मिळवलेलल्या यशाचा संस्थाध्यक्ष प्रभाकर सनगरे, अध्यक्ष अभिमन्यू शिंदे, कार्यवाह सीमा खेडेकर, सहकार्यवाह अनिल नांदळजकर, खजिनदार योगेश शिंदे व इतर संचालक मंडळातील सदस्यांनी अभिनंदन करून पुढील राज्यस्तरीय स्पर्धेसाठी शुभेच्छा दिल्या. श्रेयस याने मिळवलेल्या यशाचा सोनवडे पंचक्रोशीत गौरव होत आहे.
