मुंबई: कोकण रेल्वेवरील अत्यंत महत्त्वाची समजली जाणारी रत्नागिरी-दादर पॅसेंजर रेल्वे सेवा पूर्ववत करण्यासाठी आता कोकणवासीयांनी आक्रमक पवित्रा घेतला आहे. या मागणीसाठी शनिवारी, ४ एप्रिल २०२६ रोजी कोकणातील विविध संघटनांच्या प्रतिनिधींनी दक्षिण मध्य मुंबईचे खासदार अनिल देसाई यांची शिवसेना भवन येथे भेट घेऊन सविस्तर चर्चा केली.
रेल्वे प्रशासनाचे धोरण अन्यायकारक
या भेटीदरम्यान शिष्टमंडळाने रेल्वे प्रशासनाच्या भूमिकेवर तीव्र नाराजी व्यक्त केली. रत्नागिरी-दादर गाडी पूर्ववत न करणे हा प्रश्न प्रशासनाने प्रतिष्ठेचा केला असून, त्याला त्याच पद्धतीने प्रत्युत्तर देणे आवश्यक असल्याचे मत यावेळी व्यक्त करण्यात आले. केवळ एक गाडीच नाही, तर मध्य रेल्वेने महाराष्ट्रातील तब्बल २८ गाड्या बंद केल्याकडेही खासदारांचे लक्ष वेधण्यात आले.
प्रमुख मागण्या आणि चर्चा:
- गाड्यांचे नियोजन: परराज्यात जाणाऱ्या गाड्या दिवा किंवा पनवेल येथून सोडाव्यात आणि महाराष्ट्रातील सर्व गाड्या दादर किंवा CSMT वरूनच चालवाव्यात.
- सर्वपक्षीय लढा: कोकणातील सर्व खासदार आणि आमदारांनी राजकीय मतभेद विसरून हा प्रश्न केंद्रीय रेल्वे मंत्र्यांकडे मांडावा.
- जनआंदोलनाचा इशारा: हा प्रश्न सुटला नाही तर मोठे जनआंदोलन उभारण्याची गरज असून, कोकणातील सर्व संघटना त्यासाठी सज्ज असल्याचे यावेळी सांगण्यात आले.
खासदार अनिल देसाई यांनीही या प्रश्नाचे गांभीर्य ओळखून जनआंदोलन आणि एकत्रित पाठपुराव्याची आवश्यकता असल्याचे मान्य केले.
बैठकीला उपस्थित मान्यवर:
या महत्त्वपूर्ण बैठकीत खालील संस्थांचे प्रतिनिधी उपस्थित होते:
- श्री. जयवंत शंकरराव दरेकर (संस्थापक अध्यक्ष, कोकण विकास समिती)
- श्री. अक्षय मधुकर महापदी (रेल्वे अभ्यासक)
- श्री. शांताराम शंकर नाईक (अध्यक्ष, अखंड कोकण रेल्वे प्रवासी सेवा समिती)
- श्री. नितीन सखाराम जाधव (संस्थापक अध्यक्ष, जल फाउंडेशन)
- याशिवाय श्री. दिलीप कदम, श्री. संतोष भोसले आणि श्री. प्रमोद बागवे यांचीही उपस्थिती होती.
